滙豐銀行噚日舉行咗今季最後一次嘅「為我講故事」活動，特別搵咗屬口琴高手嘅資訊科技主管楊月波阿YB，講故事畀近百個學生聽。YB一邊講故事、一邊喺適當嘅時候哼音樂，極之生動；講到故事嘅下半部時，佢重使出絕招，露咗兩手口琴技藝，壓軸一首《羅馬尼亞狂想曲》，聽到啲細路狂嗌「安哥」，佢都不負眾望再吹咗首《假面舞》多謝支持。
聽YB講，佢讀書嘅時候已經不時參加聯校比賽，到咗𠵱家，都重會同班朋友一齊四圍表演。至於講故事呢，佢就話好少機會講喎，因為佢嗰兩個女都已經二十幾歲嘞！不過，八方認為佢唔怕冇機會嘅，YB都好快會做外公啦，到時咪可以講故事畀個孫聽囉，重可以教埋個孫吹口琴㖭。
傳真︰2623-9278
電郵︰