日本長青組合Southernallstar（SAS），早排推出過細碟《彩~Aja~》之後，將會再喺今個禮拜三推出佢哋今年第二張雙A面細碟《你才是star?夢中消失的Julia》。
新歌《夢中消失的Julia》係幫日航（JAL）拍嘅廣告歌，主要係宣傳間公司新開嘅中國杭州路線。一班SAS成員都有份參與廣告演出，佢哋重特別去到杭州西湖拍攝廣告同埋MV㖭。成個MV勁有中國feel，搵嚟一班雜技演員喺旁邊玩雜耍，認真抵死。不過至頂癮都係首MV中間，個水着女洗洗吓泳池，無端端變咗做荷花池，真係娘得嚟又好搞笑。
而另一首《你才是star》係日本豐田汽車為日本奧運選手打氣嘅廣告歌，雖然首歌係勵志歌，但喺隻MV嘅末段，桑田佳祐俾老婆原由子揸頸揸到淚流滿面，真係夠晒過癮。
呢隻碟嘅限量版除咗會有噴水同射煙花兩個唔同嘅封面之外，重會推出黑膠唱片同錄音帶版，其實SAS自九六年之後一路冇再出過錄音帶，相信會成為fans搶購嘅目標。