郭富城由四大天王崛起至今，在樂壇足足紅了逾十年，身家早已過億，名成利就，但近年他的事業步入低潮期，無論在樂壇抑或在影壇上均出現悶局，城城現正努力尋找機會，謀求突破。
對於現時的悶局，城城仍然躊躇滿志地說：「當一個藝人去到高位有回落，呢個情況好正常，我承認𠵱家係我嘅低潮期，因為歌迷聽咗我唱咁多年歌，可能會覺得冇乜新鮮感，而我不斷喺度摸索緊，希望喺音樂方面做到啲唔同嘅嘢，同時我都希望抽多啲時間拍戲，等自己拍到代表作。」
城城認為當年能在樂壇站穩陣腳，並躍身為四大天王，除了憑個人努力和實力外，運氣亦很重要，他很感激幸運之神的眷顧。至於將來的路途雖然崎嶇，但他仍然堅持走下去，他說：「其實人生有挫折係冇所謂嘅，可以當係經歷，問題係點樣克服。我覺得最緊要係唔好洩氣，三十九歲對一個男人嚟講唔係大年紀，不過可能我要諗吓點轉型，唔再諗以前嘅成功因素。如果今日做得唔好，我咪當吸收教訓囉，然後再諗吓點樣可以做好啲。」
城城今年演出杜琪峰執導的《柔道龍虎榜》，表現獲導演讚賞，城城開心地說：「可以拍杜琪峰嘅電影，我的確好期待，雖然導演要求好嚴格，但佢個人好好，喺開工時如果做唔到佢嘅要求，導演會好嚴厲咁話每一個演員，我都俾佢話過，但我又唔會好介意，因導演係想部戲同演員好先會咁肉緊，如果佢唔想你好，真係話你都嘥氣啦。。」
除了杜琪峰外，城城今次能與古天樂和梁家輝等演員合作，他說：「家輝會教我好多人生道理，而咪睇古仔平時唔多出聲，但佢喺片場做戲係好認真同專心。
「杜導演就令我有唔少啟發，特別係演戲，老實講我以前拍戲或唱歌真係幾掛住個樣，連條眉毛畫得好唔好都好緊張，但阿杜就要求演員將所有形象放低，唔好有咁多顧慮，所以我拍呢部戲，當街喺石屎地同古仔撻來撻去都幾傷㗎，但我都好開心去做，因為我知呢個導演拍戲好認真，」
不是跟城城同住的郭媽媽，每當閱報得悉兒子拍戲弄傷身體都會感到肉痛，故此城城會主動告訴母親情況，免得她擔心。
現時郭媽媽與城城的哥哥姐姐一起居住，有空就偕朋友出外旅行，城城說：「爹哋唔喺度之後，媽咪𠵱家好少打牌，其實對媽咪，我都有啲內疚，因為自己咁多年習慣咗一個人住，好想有多啲空間，所以選擇唔同屋企人住，加上工作忙又唔定時，變咗平日同佢哋見面時間真係唔係咁多。
「不過大時大節，我點都會抽時間同家人食飯，周不時又會同媽咪講電話，等佢知道我做緊啲乜，好彩媽咪性格幾樂觀，得閒就會同朋友出國旅行，知道媽咪生活得幾充實同開心，我先比較放心。」
撰文：陳月媚
攝影：陳志嵐
場地提供：銀河映像有限公司
