可能因為昨日天氣唔係好好，加上飛人佐敦啱啱嚟過，令噚日小奧尼爾訪港冇想像中咁「爆棚」；臨近活動開始時，更有職員喺門口派飛，問途人有冇興趣睇奧尼爾，同上次飛人來港嘅聲勢真係差得遠。
今次謝美恩奧尼爾訪問行程都幾匆忙，加上由上海飛嚟時航班延誤，搞到飯都冇時間食；之後大會專登買咗件三文治畀佢頂肚，不過因為趕住做球技示範，結果都係食唔切，難怪示範嗰時好似唔多夠力。
喺小奧尼爾表演球技之前，有個記者會畀我哋行家問吓佢問題。開頭諗住會係NIKE派司儀主持，殊不知竟然係現職馬會嘅李德能（圖右）；睇住佢同小奧尼爾排排企，總係有啲格格不入，有啲行家重講笑話以為呢個係足智彩記者會㖭！