中鋁（2600）上星期連跌3個交易日，星期四持穩，星期五急彈4%，係轉勢好兆頭。
中鋁上星期連跌3日，主要有分析話，國際氧化鋁價有調整，加上國際氧化鋁進口價企喺3700元，重低過中鋁出廠價4300元，作為全國唯一氧化鋁生產商，中鋁股價即時受壓。但話分兩頭，這邊廂有人擔心，那邊廂，名牌如新加坡政府投資機構GovernmentofSingaporeInvestmentCorp（GSI）及摩通，就再現增持中鋁之勢。
GSI所持中鋁權益，由5月21日4.78%，增加到上星期二5.06%；至於摩通，所持中鋁權益亦由本月初5.25%，增至6%。名牌無視利淡消息，是否意味氧化鋁價格調整，已告一段落？
又中鋁持有71%股權的氧化鋁附屬公司山東鋁業，作出盈利預測，表示04年上半年（6月止），業績升1倍。照推斷，中鋁04年上半年度業績，可再創高峯。國企股業績期將到，資金輪流炒業績股，無謂想得太遠，中鋁有炒中期佳績條件，配合上星期尾段先轉勢，技術位睇本月初阻力4.6元，已經有魚有肉。
本周第二件中石化（386）。集團屬中國以至全亞洲最大汽油、柴油、航煤煉油分銷及營銷商，規模及優勢稱霸。受惠原油價高企，中石化已經發盈利預測，指04年中期（6月止），純利增長50%過外。現階段，油價仍然維持歷史高位徘徊格局，受惠呢個因素，相信中石化全年度業績，亦一樣標致。
上星期所見，系內公司以吉化（368）作先頭部隊，已經突破今年5月以來橫行阻力頂，而中石化星期五先有反應，試圖突破3元位橫行頂，估計中石化會緊隨吉化之後，破位即上。
錢雋