基斯普同埋華朗來季分別效力米蘭雙雄，就算各為其主一樣老友鬼鬼，最近有消息話基斯普就算幾唔方便都要搬去華朗隔籬住，怕且想分開呢對難兄難弟都真係唔容易。
呢兩個阿根廷國腳由踢國家隊、效力帕爾馬同拉素，以至上季一齊失意於車路士，經常同喜同悲，感情好自然不在話下。當華朗最近喺米蘭聖西路球場附近買咗間屋後，基斯普有理無理，連之前喺米蘭買落間舊屋都唔住；又唔介意放棄與AC隊友為鄰、遠離AC球會辦事處，近日都忙於喺華朗新居附近覓居所。雖然基斯普轉完會又打算搬屋，不過就留用以前喺意大利用開嘅電話冧巴，新知舊雨想搵佢出嚟蒲，包保唔使左抄右抄。
阿柏天尼近年發展麻麻，前季被借去馬體會後，上季被AC回收無耐又遭送去拉素。最近有指拉素續散貨，好可能將阿柏天尼送去升班馬阿特蘭大。係人都知阿特蘭大偏重青年球員，阿柏天尼三十三歲人踢嘅球會一隊不如一隊，家陣隨時要同班小朋友爭位，望佢企穩住腳啦。
一直被傳係同性戀嘅阿仙奴中場龍格保，喺日前好高調咁帶咗個英國模特兒高迪返瑞典老家度假，重要係無論去食飯定去沙灘都俾傳媒影到；而佢哋被影到之後，唔單止冇嬲，重四萬咁嘅口面。有口痕友就話，都唔知龍格保係咪做騷咁做，等人哋唔再傳佢係基民。
早輪我求大俠咪講過已降班英甲聯嘅列斯財政有幾唔掂，不過，佢哋嘅球迷都算有情有義，因為列斯喺新一季嘅季票已經賣出咗一萬七千套，睇個勢極可能賣到二萬套左右；同上季佢哋重係踢超聯時，只係少咗五千套，唔怪得之令列斯職球員都喜出望外，重話要踢好啲比賽報答球迷。
我求大俠唔算係網球迷，但好佩服威廉絲姐妹。其中妹妹莎蓮娜喺溫布頓決賽遭滑鐵盧，輸咗畀俄羅斯靚女舒拉寶娃，但一啲都冇打擊佢嘅自信。佢話要打好網球嘅同時，絕對唔會放棄演藝事業：「唔係好多運動員能成功做演員，但我自信做到，重想獲提名奧斯卡㖭！」