噚日八方收到新城財經台嘅採訪邀請，今日下午該台邀請咗數名「體壇CEO」出席，有身兼香港跆拳道總會主席嘅大中華證券CEO蕭炎坤；既是香港武術聯會副主席，又是永亨銀行旗下永亨信用財務CEO嘅冼國林；重有傑志足球總領隊暨EPDSystemCEO嘅伍健；同埋駿陸控股嘅CEO——亞運乒乓球銀牌得主陳丹蕾，佢重會即場打乒乓波㖭。個個咁打得，呢個「武林大會」一定精采！
原來攞過世界傑出華人獎嘅蕭炎坤，係跆拳道黑帶高手，香港跆拳道協會就係由佢一手創立。而平日「官仔骨骨」嘅冼國林，估唔到會係武林高手，佢閒時會免費教授中國武術，前排重飛咗去北京，考取武術評判資格。
講起體壇，八方又諗起奧運體操金牌得主李小雙，佢雖然唔係CEO，但就係上個月上市嘅李寧公司股東。李小雙呢排好紅，噚日去完紅磡都會商場做表演嘉賓，示範奧運高難度動作，今日下午又要穿梭九龍新界，先去海逸豪園，再入天水圍，然後再去沙田。其實李寧都係體壇CEO之一，可能佢唔得閒啦，如果唔係新城一定想請埋佢出席今日嘅聚會。
（圖）?陳丹蕾今日會即場表演打乒乓波。
資料圖片
傳真︰2623-9278
電郵︰