郭富城以往在四大天王的全盛期，極度顧忌形象，但經過近年事業低潮後，反令他豁出去，至少他敢於承認事業下滑、演戲時肯忘記眉毛畫得靚不靚。至於愛情，城城卻看得很淡，因現在尚未有一個女人能夠留得住他。
郭富城在演藝圈這麼多年，甚少談及感情事，不過三年多前，他與日本性感女星藤原紀香因合作電影《雷霆戰警》而發展戀情，最甜蜜時更傳出紀香將是城城的結婚對象，惜這段異國情緣年多前無疾而終。
不過兩位當事人由拍拖到分手，均未公開承認過戀情，縱使在這次訪問中再三追問他與紀香是否已分手，城城亦只輕輕帶過說：「唔講啦！」
最近紀香在日本傳出婚訊，新郎卻不是他，對此城城只淡然說：「我同紀香𠵱家係好朋友關係，間中都會聯絡，我冇喺佢口中聽過結婚消息。老實講我拍過幾次拖，但重未有一個女人可以留得住我，𠵱家我都冇拍拖，最近一段感情已經係兩年幾前嘅事，呢段感情係有過幾好嘅回憶，但最終因為雙方實在有太多問題發生，大家覺得都係做番朋友比較舒服啲。」
城城揚言假若將來再談戀情，仍選擇不公開，他解釋：「一旦公開咗，每次見到記者就會俾人問感情事，但呢啲係好私人嘅事，我真係唔想成日向公眾交代，同埋個對象可能未選定，根本就唔係適合公開嘅時候。好多年前我重試過同時間有唔止一個女朋友，你話公開得邊個？
「𠵱家個人大咗，唔想傷害人哋，拍拖一個就一個。其實我呢段單身期，都有女仔表示對我有好感，想約我去街，以前嘅我都可能會試吓應約，但𠵱家明知對人冇意思就唔會應約，免得對方有誤會。」
面對事業的低潮期，城城坦言緊張事業多過愛情，他說：「我覺得對男人嚟講，愛情唔係生命嘅一切，我唔係嗰種會為愛情瘋狂嘅人，男人始終會比較有事業心，加上我份人都幾好勝，𠵱家我最關心係點樣可以再做番好自己嘅事業，我心願最想做一齣音樂劇，希望嚟緊日子可以達成呢個心願。」
