不少啦啦隊義工噚日照樣到場打氣，好似來自聖傑靈女子中學嘅中一生Christie話齋，一來自己想睇波，二來有爸爸接送，於是同一班同學照原定計劃到紅館。其實，賽會噚日喺兩點幾打電話問班啦啦隊，話佢哋知可以唔到，但想去嘅又無任歡迎。聽聖公會林護中學嘅阿sir講，原本有來自八間學校共三百名啦啦隊員會到紅館做啦啦隊，但只到咗四分一人。佢都話驚班學生喺八號風球出街有危險，但啲係學生自願嘅，佢都冇符啦！
「圓規」令到逾千排球迷得到免費睇波嘅優惠。事緣噚日掛起八號風球，但大批買咗門票球迷（預售約四成）喺六點比賽前已到場；但排總基於特區政府呼籲市民八號風球不要到場睇比賽，於是索性以讓球迷入內避雨為由，開放場館給球迷入內「避雨」兼睇波。球迷仍可保留完整門券，在周日比賽後做退票手續（退票查詢可致電香港排球總會27710293或紅館23557234）。不過，在下午七時許改掛三號風球後，在場職員立刻向在場觀眾收集門票，早嚟者博到免費睇波咯。
中國女排大槌手楊昊的母親，昨日剛好來到香港，於是順道到紅館捧愛女場。排總亦識做，預留一個前座位置予楊母。
賽會喺門票銷售方面已有損失，所以希望喺其他方面搵番啲收入補數，故此場外照樣有排總人員開檔賣紀念品，包括平價T恤、皮製小排球及小型中國球衣等。呢班排總人員都幾慘，八號風球都要照樣開檔賣嘢。
香港辦女排賽同颱風結下不解緣，而且個風都係來去匆匆，九九年香港舉辦亞洲排球錦標賽的決賽日，當時頭場開始時正掛八號風球，後來第一局過後「落波」。