楊千嬅同白靈主演、陳可辛監製嘅鬼片《餃子三更2之一》將會喺下個月十九號上映，千嬅第一次拍鬼片，之前話好擔心演完呢個角色抽離唔到。佢喺片中係扮一名中年婦人，化到塊面白晒，然後一臉凝重咁坐喺張枱前，食緊用嬰兒胚胎做餡料嘅餃子，馮仁昭睇落去都覺得幾詭異。
千嬅之所以咁做，係因為佢想追求青春不老，當佢聽到白靈話食咗用已死嬰兒胚胎做餡料嘅餃子會長生不老後，佢得閒就去幫襯白靈間餃子舖食番碗，你都咪話唔驚。
陳可辛大讚千嬅演繹呢個角色好投入，佢噚日喺電話度話：「千嬅演呢個角色發揮得好好，記得佢拍食餃子呢場戲，做得好專業，完全證明到佢係一個真正嘅演員，唔係單單偶像派咁簡單。千嬅從來都冇演過呢類角色，但係佢演得好搏，完全冇話要錫身。」
吳日言日前去咗元朗南生圍拍攝兒歌《魔法變變變》嘅MV，佢同兩個扮成小綿羊嘅小朋友一齊開工，吳日言嗰日雖然狂噴蚊怕水，但仍然中招，着住長褲都係咁被蚊針大髀，認真慘情。
近排同連戰公子連勝文傳緋聞嘅周汶錡，原定噚日舉行佢嗰本講結婚嘅新書簽名會，點知遇上八號颱風吹襲，搞到要取消。周汶錡表示唔會失望，佢笑住話：「貴人出門招風雨，估唔到出書都有事，可能個風係為我打氣呢！唔緊要啦，延期咪等兩次簽名會迫埋同一日，等到時迫爆個場咪重好。」
關寶慧同張學潤為有線主持《怪談》節目之餘，重會合作出書講吓自己嘅鬼怪經歷。寶慧前晚出席會展一個首映禮時，話佢早排拍完《怪談》外景之後同朋友打麻將，點知邪到連冧十幾鋪莊，食胡食到自己都驚，無論人哋打出抑或自摸都唔敢再食，重忽然有把男聲猛叫佢「食啦」，嚇到寶慧死死吓。
台灣藝人吳宗憲早前俾一位自稱係佢歌迷嘅女仔Linda，向台灣《壹週刊》爆料，鬧佢始亂終棄，又話佢自誇性能力超卓，於是吳宗憲就告個女仔誹謗罪，噚日佢喺士林地檢署出庭，吳宗憲話同Linda一齊去過澎湖同女方表姐屋企，但都只係寫下書法，絕對冇發生肉體關係，就算Linda話上過吳宗憲屋企，佢都只係話：「很多朋友到過我家。」
