由《魔盜王——決戰鬼盜船》金牌監製謝利畢咸瑪（JerryBruckheimer）炮製嘅英國古裝武打片《王者無敵》，前日喺倫敦舉行首映，自嫌雙胸太細嘅女主角姬拉麗莉（KeiraKnightley），當日着咗套充滿古典味道嘅銀灰色低胸裙出現，非常性感撩人，所以吸引咗成千fans圍觀。
姬拉麗莉自從拍完《我愛碧咸》同《真的戀愛了》呢兩部大受歡迎嘅英國電影之後，人氣急升。最近佢更喺《Hello!》網站舉辦嘅投票活動上，獲選為電影界最有前途嘅年輕演員㖭。雖然佢擔正嘅新片《王者無敵》上個星期喺美國上映時反應麻麻，但姬拉麗莉前日返到倫敦宣傳新片時，甚有衣錦還鄉之感，喺里斯特廣場就有成千位fans嚟歡迎佢。
姬拉麗莉當日除咗聯同扮演古代英國亞瑟王嘅佳夫奧雲（CliveOwen）等一眾拍檔出現外，佢重帶埋愛爾蘭模特兒男友JamieDornan現身嚟撐場，而大會更安排一位臨記扮成古代武士騎馬入場，又同姬拉麗莉合照，務求喺英國營造強勢。
姬拉麗莉同一眾演員亦未有為美國票房失利而洩氣，佢哋接受訪問時亦表示相當回味一齊接受騎術、劍術同射箭等特訓嘅時刻，佢重話：「作為一個十九歲嘅女性，自己都好想喺銀幕見到呢個咁勇悍嘅女角色。」