民主黨立法會選舉排名終於塵埃落定，李柱銘由之前盛傳排第一出選港島，變咗排第二，中間出現乜野轉變，就冇人講過，八方知道媽田由排第一變排第二，中間涉及一個重要電話，改變咗成件事。
話說原本係楊森自己話排第二，媽田一直以為講咗就係，重同屋企人、行山老友話自己排第一，點知單料星期二出咗街，民主黨負責選舉事務嘅李永達，一大清早收到一個電話，對達仔來講，打電話嘅人份量等同「陳壽山」（先此聲明，呢個人唔係來自北京，電話百分百係香港打出），佢話楊森一定一定唔可以排第二。
呢下搞到達仔唔知點算好，呢個時候媽田老友又力撐佢排第一，搞到前主席一頭煙，真係連食都唔安樂，後嚟諮詢各方友好，唔少人認為如果媽田排第一，楊森出局機會一定唔細，黨主席選輸，對媽田一手成立嘅白鴿黨肯定有好大打擊，為大局，楊森一定要贏。
媽田思前想後，都係覺得黨嘅榮辱重要過自己個人得失，於是星期四下晝搵達仔同羅致光去佢律師樓，表明自願排第二參選，達仔一聽到佢咁講，即時成身鬆晒，猛讚媽田，話佢「好大方，好欣賞佢。」但係楊森好似唔知情，到後嚟民主黨開心戰室傾選舉，重話媽田排第一，要羅致光糾正佢。
八方問達仔個「陳壽山」電話係乜水，佢只係話好多人打電話撐楊森，有男有女，佢又話7.1咁嘅勢，民主黨無理由保唔到兩個位，至於媽田，噚日已一家大細去咗澳洲度假，散心兼備戰啩！
（圖）媽田自願排第二參選，話黨嘅榮辱重要過自己個人得失。
傳真︰2623-9278
電郵︰