喺高古同安歷基離開巴塞隆拿後，啲人都諗呢間西甲聯球會係由資歷最深嘅佩奧爾嚟領陣，點知教練列卡特就打算將個隊長臂章，交畀「細哨」朗拿甸奴。
由於巴塞喺今個夏天買咗同「細哨」同位嘅古利同迪高，所以有傳「細哨」會畀巴塞以天文數字嘅價錢賣去富豪會車路士，藉以套現減債。但係，從「細哨」無端白事被選為隊長，似乎實情唔係咁樣。
「細哨」喺巴西國家隊又唔係隊長，而且喺巴塞只踢咗一季，咁都可以做隊長，照咁睇巴塞真係好睇重佢；重諗住以佢為核心，建立一支實力同成績勝過皇家馬德里嘅球隊。
雖然，「細哨」上屆幫唔到巴塞攞盃，但就助球隊出線歐冠盃，而且喺作客對皇馬場波，以一人之力打低五條A（朗拿度冇踢），表現備受好評；如果巴塞咁都放佢走，肯定俾人笑儍仔。
講開羅馬，呢隊波已經響早幾日開操，不過唔使踢美洲國家盃嘅巴西中場艾馬臣就遲遲未歸隊，繼續以患抑鬱症為理由缺課。羅馬經理巴甸尼就彈艾馬臣冇品，唔信佢好人好姐突然抑鬱。其實如果羅馬方面覺得艾馬臣係詐病，搞到咁無癮不如考慮放人，因為艾馬臣一早放晒風，想跟舊教練卡比路過祖雲達斯，只要羅馬肯放人，所謂「抑鬱症」應該不藥而愈。
羅馬尼亞冇份踢今夏歐洲國家盃，所以效力羅馬嘅後衞捷古就偷得浮生，得閒返咗老家嘅沙灘耍樂，充吓電咁話。好衰唔衰樂極生悲，整親左腳跖骨，經診斷後證實要唞三個禮拜，先至可以拆石膏。照睇捷古就算腳傷好番，都要操番一輪，據講下個月羅馬尼亞主場對芬蘭場世界盃外圍賽，都未必預佢踢得。人去玩你去玩，捷古乜咁唔小心呀，呢鋪真係戲無益嘞。
記得喺幾年前，阿仙奴柏奴亞同曼聯畢特兩位英格蘭中場工兵重有市場，皇帝女唔憂嫁，好似新特蘭就斟過佢哋，重叫到成五百萬鎊（約七千一百萬港元）㖭，但𠵱家就慘到免費都冇人要，搞到阿仙奴同曼聯想甩手都無人問津。雖然話柏奴亞同埋畢特唔算老，兼且又係國腳級人馬，但弊在近年周不時受傷，狀態保持得唔多好，而且本身周薪又高，梗係冇市場啦！