PS2喺今個暑假勁谷中文Game，繼上星期率先試玩過廣東牌《麻雀派對》後，今次換吓口味，跳入水中扮魚仔。玩家扮演嘅魚仔，以挽救水塘危機為己任，每個舞台均有主線任務需完成，途中不時跟體積龐大嘅海洋生物交手，甚至避開人類嘅魚餌陷阱，認真兇險兼辛苦，學《旺角卡門》烏蠅（張學友飾）話齋：「寧願做一日英雄，都唔做一世魚仔！」。
記者：徐影龍
遊戲類型：動作解謎
對應機種：PS2
遊玩人數：1人
行貨售價：$335
推出日期：7月15日
開發商：SCE
(c)2004SonyComputerEntertainmentInc.
要數暑假中文Game，呢隻《小魚》實在跟《麻雀派對》一樣咁有意思。事關全Game中文化之餘，重跟日本同步發售，唔使好似《TOD2》、《櫻大戰》咁等到頸都長先有得玩，最重要係Game內解謎要素、收藏Item頗多，全中文化後毋須再估估吓或一味齋跟攻略打咁無癮。
《小魚》故事係受河童伯所託，四出查訪各地靈主所在，繼而幫忙解決各種疑難，最後化解水塘危機而大團圓結局。古仔雖然十分細路仔，不過玩法又幾新鮮。遊戲背景喺水塘入面，主角除可周圍游，重有一堆求生技能；擺尾、吞食、急衝、彈跳等統統要熟習，四出探訪搵出每個水域嘅靈主，如青蛙、海獺等，滿足佢哋要求搵工具炸路、搜集果實醫病等，便可過關。
齋睇解謎好似EasyJob，不過水塘入面存在太多天敵，如大大條鱧魚、鮭魚等都會追住主角嚟咬，後期重有一群鱷魚出沒㖭。為求生，主角需四圍吞食弱過自己嘅魚毛蝦仔補身，又或搜集PowerUp用嘅鱗片，練到咁上下就可以反咬一啖，引證弱肉強食嘅真理，最後重可收集喺「獵物圖鑑」回味。
人類亦屬天敵之一，水塘入面各式看似可口美味嘅魚仔，大多係垂釣人士嘅魚餌，食落肚先發覺「瀨嘢」，亦可反方向狂衝，務求扯斷魚絲甩身，成功後又可收集該魚餌嘅樣本落圖鑑。
SCEH特別預留50隻最新一集嘅PS2新GameDVD巡禮畀《蘋果》讀者，入面包括新鮮熱辣嘅《魚仔》、《EyeToy:Play》，以及未出街嘅《嗶波猴終極熱戰》，收錄作品多達17套，機迷當收藏品都唔錯。讀者只需手持今日本版，到指定換領點，便可免費換領一隻PS2新Game影像DVD，每人限換一隻，換完即止，想攞趁手。
換領站：星星電子
地址：深水埗黃金商場地下22號舖
