香港噚日掛八號波，港股只得唔夠半日市，但成交金額有成93億銀，尤其係滙控（005）成交超勁，高達22.16億元，睇落有啲唔簡單。
雖然噚日橫風橫雨，但經紀黃話仍然有公司冒住大風大雨搞路演，就係即將注入國美電器的中國鵬潤（493），據講在某歐資大行策劃下，公司將展開一連串推介活動，目的當然係抽水集資。
經紀黃話，唔好以為鵬潤今次係一般嘅集資，抽水嘅金額據講要成幾十億銀，認真唔簡單。
小初唔知人地搞唔搞得成，但就覺得有難度。鵬潤今次反向收購國美，PE高達50倍，就算日後生意增長真係爆晒燈，但有分析員計過，未來幾年預測PE，點計都會有雙位數字，今次集資額咁大，必須有大基金肯制先可以成事，究竟班芬佬對國美係咪真係咁樂觀？
雖然鵬潤搞緊大茶飯，但隻股噚日好靜，收0.22元，微跌唔夠0.5%，半日成交只得10萬股，金額2.20萬元。
慕容小初