立法會收爐，各路人馬自己謀出路，退出嘅如華叔、李家祥、羅致光以及許長青當然冇乜嘢好諗，其他人就好多要嚴陣以待。八方日前碰到保險界嘅陳智思，佢胸有成竹咁同八方講，九月競逐連任應該冇問題，因為佢個界別冇乜人會同佢爭。
雖然選民對佢咁有信心，但係陳智思話自己選埋呢屆就唔再冧莊，因為做到二○○八，剛好做咗十年議員，乜都夠皮，應該畀其他人試吓。陳智思嘅理論係功能組別選舉屬熱身運動，等啲新人，特別係來自商界嘅學嘢，之後一係轉去直選，一係就做其他社會公職，都一樣有貢獻。
陳智思理論多多，但係都言之有理。八方見佢面色好好，問佢最近身體狀況如何，佢話始終有啲問題，今次輪到個胃嘅消化能力唔係幾好，要少吃多餐，上星期已經返泰國檢查過，下個星期會再返老家，徹底睇吓乜事喎。
傳真︰2623-9278
電郵︰