中石油有水位
一味窩輪：9343溢價低可吼

打風，個市得兩個鐘頭炒。國內A股B股好掂，本港國企紅籌亦跑贏藍籌。國指升幅2.63%大過恒指升幅1%好多。國指升109點，着咗61點（一半以上）歸功於中電信（728）、中石油（857）、中石化（386）、中鋁（2600），就講吓呢4大天王嘅窩輪。
中電信收2.675元，升4.9%。Call輪交投唔活躍，9843收13.8仙，升24%，槓桿率19.4倍，有爆炸力，不過溢價去到16.6%，而壽命只係3個月，正股又距離月初高位有限，值博率唔高。9795收36.5仙，升18%，壽命同9843相若，溢價10.8%，槓桿率7.3倍，數據好過9843些少，不過交投太靜，又係諗唔過。

炒中石化輪9409要快手
中石油收3.75元，升幅2%。正股升幅唔算大，有水位，Call輪可以揀嚟炒，主角係9343，12月中到期，輪價66仙，溢價2.4%，槓桿率5.7倍。槓桿率唔算吸引，但勝在溢價低，揸耐少少都唔怕蝕溢價。短炒，則揀交投活躍嘅9839，10月到期，輪價20仙，槓桿率18.8倍，要畀高啲溢價，即係6.7%。
中石化收2.95元，升幅2.6%。正股升勢未盡，有得去，短炒揀9409，屬平均結算輪，昨收5.2仙，升幅13%。炒呢隻，快手快腳。
中鋁收4.075元，升幅4.5%。Call輪2167與9140升11%同13%。雖然明年先至到期，但槓桿率只係9.1倍同4.6倍，而溢價則係31%同27%，買唔過。賭正股重有得去，直接揸正股好過，起碼唔使諗唔易甩手問題。
章盛