近排住宅市道呆滯，買家入市意欲低，發展商惟有以優惠或減價招徠，南豐將軍澳廣場，以及荃灣翠豐臺，買兩房及三房單位，可得五萬及七萬宜家家俬禮券，若果唔要禮券，樓價可以扣減三萬五及五萬。
南豐又送兩年管理費、釐印費，以及提供年半免息供，優惠相等於樓價五個巴仙。
南豐賣樓手法一向靈活，一見市況有變，率先減價，好似五月底賣地前，呢兩個樓盤就劈價一成，反應理想，三日賣近百六伙，套現三億二。後嚟削減優惠，銷情放緩。
自由行推動零售業，市場人士睇好商舖投資價值，搞到唔少核心區舖位，回報率跌到得番三四厘，但有啲今年買入嘅，業主租出單位，都可以獲得一分回報，認真吸引。
華滙楊開永話，旺角亞皆老街三十六至三十八號地下及一樓，三月以近二千萬交吉交易，剛獲連鎖食肆，以月租十七萬承租，回報有十厘三。
至於西環卑路乍街1L至1Q地下四號舖，二月成交價逾四百七十萬，現以月租三萬八租出，回報率近九厘七。
另外，近期有啲連租約舖位買賣，租金回報率都唔錯，例如銅鑼灣禮頓道一○六至一二六號地下1A及1B號舖位，以五百八十萬售出，舖位由三個租客承租，合共月租近三萬三，回報率有六厘七。
颱風圓規襲港，初時大家以為，噚日只會掛三號波，點知，上晝已經掛到八號，搞到好多活動大失預算，要取消或延期。
中記兩個記者招待會，及美記一個，齊齊取消；日進測量行話，原定噚日舉行嘅拍賣會，延至下周一。
另外，美記代理標售嘅北角春秧街一百號，原定噚日中午十二點截標，該公司發言人話，因颱風關係，押後一日。至於產業署，噚日截標嘅六個渣甸山愉富大廈公務員宿舍，相信都要改期。
地膽代理主要做街坊生意，因此十分着重與街坊打好關係。
屯門地膽代理祥益地產，營業董事盤嘉茵話，當天文台話可能掛八號風球，該公司便會派出職員，為每個放盤吉屋檢查，以及鎖好門窗，颱風過後，再做一次檢查，結果會以書面形式通知業主。
盤嘉茵話，呢個行動代號「女媧行動」。
祥益現有吉屋放盤六百個。
美資摩根士丹利房地產基金，舊年夥同本地鵬里資產管理，斥資超過八億四，購入上環維德廣場。該廈全幢翻新已經完成，𠵱家攞八萬呎出嚟招租。
中原集團李百堅話，叫價淨呎租由十蚊起，即時有成交，十一樓四千幾呎，淨呎租十蚊，租期三年。佢透露，租客可享免租期至十月底。
李百堅話，同區中遠大廈，質素同維德差唔多，但淨呎租就要十三至十四蚊。即使維德現有租戶嘅租金，都要十二至十三蚊。
蘭西
電郵地址：
