開始踏入暑假黃金檔期，各大遊戲商都出盡力催谷旗下產品。SCEH最大搞作就梗係中文遊戲，重預計連出五隻㖭！今個星期隻《魚仔》推出之後，輪到隻水着美女《麻雀派對》。而Game迷餓咗幾年嘅射擊名作《GRADIUSV》就喺7月22日推出，球迷睇完歐洲盃、美洲盃唔夠喉，可以順勢玩埋隻8月8日推出嘅《WINNINGELEVEN8》，行貨定價$438。話時話，大陸中文版《WINNINGELEVEN7》上個月先推出，日本咁快出隻8代都真係大整蠱。
任天堂近幾年暑假，都以瑪利奧叔叔主打，今年GC嘅《紙板瑪利奧》（7月22日）＋GBA上嘅《瑪利奧兄弟2》（8月10日），都有唔少機迷期待，質高量少合乎任記作風，相信到時好大機會如《Pikmin2》咁出現炒風。
今個暑假以主機款色做主打，透明冰姬XBOX真係幾搶，不過無厘頭加送部水機，搬返屋企都唔少嘢，鬼叫大作好似《HALO2》、《OUTRUN2》等都要年尾先殺到，暑假惟有整色、整水谷吓機囉。
文：打機鐵人