先科國際（724）被廉記調查一事餘波未了，由於涉案中有位仁兄，多年來為上市公司配股集資不計其數，所以佢曾經幫過手嘅新海能源（342），噚日一度被質低三成，江湖中好事之徒，自然將事件聯想到該位仁兄被查一事。
新海噚日最低見8仙，收9.9仙，跌14.6%，成交股數有1.79億股，金額1746萬元，在淡市之中特別顯眼。
除咗新海之外，先思行（595）亦因為同一個原因受壓，抵銷咗早排公布業績靚仔及就有收購行動的利好消息，呢幾日備受壓力，由高位1.40元回落，噚日再跌1.65%，收1.19元，但成交股數就唔算好大，只得98萬股，金額117.6萬元。
經紀黃話，雖然該位仁兄曾經大力推介過先思行，但實際上好多外資行亦推介過隻股，由於芬佬坐落唔少貨，理論上大家唔使咁驚青，問題係家陣市況確係不利二三線股，所以唔建議喺風頭火勢之時博反彈，不妨等股價跌定，大市氣氛好番時再考慮。
慕容小初