噚日美洲國家盃智利對哥斯達黎加場C組賽，可算係今屆最富戲劇性比賽。哥軍到補時三分幾鐘至憑靴朗嘅入球，爆半冷反勝智利而驚險出線夠激，最慘都重係A組玻利維亞因為呢個入球喪失出線權，白等兩日最終得個桔。
智利上半場入波領先後個勢本來好好，可惜下半場整球中楣波無耐就俾對手扳平，跟住狂攻猛打都唔入，重臨尾香。假如靴朗呢個終場前一分鐘球波唔入而和波，次佳第三名個位就落響玻利維亞手上。
玻利維亞球員踢完禮拜一場波後留響秘魯，就係為等呢場波戰果，結果白等兩日就係差呢一分鐘就要執包袱。
除戰況外，話呢場波最富戲劇性，係因為終於出現今屆第一次「半全場」開客?主呢個大冷組合。
希臘捧走歐國盃，轉會市場掀起「希臘熱」，連一啲之前唔係太出名嘅希臘球員都搶手，例如意甲升班馬卡利亞里，日前引入希臘響歐國盃嘅後備龍門卡達基亞基斯；而另一升班馬麥斯納亦唔執輸，連希臘非國腳龍門伊利夫達荷普路斯都唔放過，唔知算唔算有殺錯、無放過呢？
就響我求大俠側聞舒利亞威脅退休之際，同時聽聞另一「舒」–舒寧咸嘅消息，佢已經落實加盟英甲球會韋斯咸，今季落力爭取成績。眾所周知韋斯咸野心勃勃，舒寧咸走入事業黃昏路仍繼續搏殺，重可以返佢涉足多年兼出身嘅倫敦打躉，認真有魄力，「老黃忠」當之無愧。
今個夏天喺東亞進行表演賽嘅歐洲球隊多不勝數，名牌如巴塞隆拿、皇馬同華倫西亞；而早排走咗AC米蘭後，紐卡素又到咗香港。重有一隊英超球隊訪問亞洲，唔係愛華頓，而係查爾頓，佢哋下個星期會到深圳季前集訓八日，同深圳健力寶友賽，真係大細球會都要到亞洲掘金幫補吓！
「黑雙煞」高爾同約基喺布力般前景堪虞，高爾如果唔減薪都幾難投富咸；約基重慘，球隊去德國季前集訓，但佢就要留喺英格蘭，重講明如果約基搵到球會落班，肯賠六十萬鎊(約八百六十萬港元)畀佢。我求大俠就唔多睇好約基可以喺英超轉到會，怕且要去卡塔爾至有機會咯！