個市暫時冇乜方向，恒指高低波幅只係73點，埋單微升6點。國指醒神些少，有12點進帳。市場預期的石油同石化股上半年業績靚靚，資金流向呢類股份，吉化（368）與中石化（386）已發出上半年盈利大增預告。
國指成份股中，重磅嘢中石油（857）與中石化都進帳，相信會繼續做好，對國指有利，可以諗啲中企指數Call輪短炒。9948同9965兩隻都係10月尾夠鐘，條件差唔多，前者輪價10.7仙，溢價9.6%，槓桿率10.9倍，後者輪價14仙，溢價9.8%，槓桿率10.7倍。兩隻輪嘅溢價唔低，炒炒吓OK，坐盤坐得耐則易輸在溢價收縮。其他好幾隻中企指數Call輪，啲溢價更加高，揸住佢哋，撞啱指數唔郁，就要輸錢。
美國Intel派成績，市場唔肯收貨，單日跌幅高達10.6%，不過美股唔係跌得多，昨日日股又升番啲，睇情況，港股喺冇方向中，都有機會硬淨番少少。跌得多嘅大藍籌，可能會反彈些少。
中移動（941）與聯通（762）近排跌得急啲，有反彈之機。中移動Call輪可以揀9813，12月初到期，輪價22.5仙，溢價6.6%，槓桿率9.6倍。另一隻10月到期嘅9769，輪價6.8仙，槓桿率雖然有31.9倍，但溢價13.2%相當高，風險唔細。聯通Call輪，則好難揀得落手，較大成交嘅9844，10月上旬到期，輪價22.2仙，槓桿率26.1倍，不過溢價24.5%太高。
章盛