許志安同鄭秀文（Sammi）分手都有一段日子，佢哋未分手前離離合合嘅新聞都聽咗十幾年，到咗𠵱家分咗手，有關佢哋嘅消息依然傳個不停，早排馮仁昭先聽到有人講，話安仔同朋友去唱K時忍唔住喊咗出嚟，因為同Sammi分手好傷心喎。
噚日馮仁昭又收到個email爆料，內容係話Sammi親口同爆料者講，安仔喺○二年問Sammi借咗二百萬港紙，一直都唔肯還，而且重唔係第一次借錢，呢個亦係佢哋分手嘅原因之一。
Sammi係富婆就係人都知，但安仔亦係啱啱冇幾耐前先買新車，應該未至於咁手緊，於是馮仁昭打去問吓安仔，安仔聽完就笑一笑，然後再歎氣講：「呢啲嘢我只有四個字，一笑置之。」
由於Sammi𠵱家忙緊排練同宣傳嚟緊嘅演唱會，所以佢只係透過佢經理人郭啟華傳話，郭啟華就轉述咗Sammi嘅回覆，佢話：「Sammi話呢件事好無稽，地球上從來未發生過啲咁嘅事，如果再有任何人做埋啲咁無聊嘅事情出嚟，而造成誹謗，佢唔排除會採取法律行動，Sammi亦都唔希望再有任何人做任何嘢嚟影響安仔嘅聲譽，因為根本冇啲咁嘅事。」
早排原本盛傳珍妮花雅麗絲頓（JenniferAniston）終於懷有老公畢彼特（BradPitt）嘅骨肉，而且重話諗住等個胎兒穩定啲，兩個人就會向外公布呢個喜訊，點知好景不常，有美國小報報道話珍妮花原來已經不幸流產，佢哋想做父母嘅願望又再落空，相信佢兩個為咗呢件事一定傷心到瞓唔着。
最近新城幫啤梨設計咗張電腦相宣傳佢嘅電台節目，相入面嘅啤梨有六嚿腹肌，好鬼大隻，啤梨自己見到張相，都忍唔住笑咗出嚟，啤梨話自己覺得圈中男藝人以許志安嘅身形最好，健碩得嚟又唔會太大隻，希望自己有朝一日可以練到安仔咁嘅身形喎。馮仁昭覺得張相好鬼假，啤梨都係時候的起心肝操吓，下次就唔使造相啦。
男子組合Boy'Z噚日喺灣仔出席「白蘭氏紓壓．創意列車」活動，佢哋各自有減壓方法，Steven話：「我會打籃球。」而Kenny就話：「我會游水同瞓覺，我之前游水俾人影到，所以𠵱家改去私人泳池游水。」Boy’Z遲啲重會拍埋寫真，但佢哋就話自己一定唔會露股囉。
李力持噚日喺土瓜灣為佢出版社今年推出嘅五本書搞記者會，其中一本《亂世街人》就搵咗《少林足球》嘅六師弟肥仔聰同官恩娜重新演繹經典名作《亂世佳人》個封面及入面嘅插圖，但書嘅故事內容就會同名著唔同，以講青少年嘅奮鬥過程為主，李力持重大讚官恩娜影相時因為唔怕醜，所以出嚟嘅效果先有咁好。
年尾就結婚嘅歐陽妙芝，呢排話跳舞減肥，不過可能重未有成績，佢噚晚喺灣仔行騷，就自爆話因為太肥着唔落新裝，佢話：「本來大會安排咗兩件靚衫畀我，不過可能我太肥，着咗好緊唔好睇，最後惟有換過兩件衫，重搞到嗰個年輕設計師非常尷尬㖭！」妙芝又話自己𠵱家成一百三十磅，同當年選港姐嘅一百一十八磅，相差起碼十磅喎。
