最近美國做咗個統計，計出邊個係今年上半年喺全世界舉行巡迴演唱會賺錢最多嘅歌手，樂壇大姐麥當娜（Madonna）雖然敗喺男歌手Prince手下做阿二。但佢今年只喺七個城市開過二十一場演唱會，平均喺每個城市賺六百四十一萬美元，即係約五千萬港元，威盡全球。
今年上半年喺全球開騷賺得最多錢嘅係上年嚟香港擔任維港巨星匯開幕表演嘉賓嘅美國黑人歌手Prince，佢上半年好勤力，喺四十四個城市度開咗五十四場個唱，總共賺咗四千五百七十萬美元，約三億五千六百萬港元。而第二位嘅麥當娜，呢半年只係開咗二十一場騷，就賺咗四千四百九十萬美元，約三億五千萬港元，平均每場賺一千七百萬港元，認真犀利。
其實娜姐比Prince更厲害，因為娜姐啲飛平均價格係最貴，要成一千三百港元一張，所以佢平均喺一個城市都賺成五千萬港元，係Prince嘅六倍。而娜姐今年下半年，亦密密有騷開，預計全年可以為佢帶嚟一億二千萬美元，即九億四千萬港元收入。
至於第三位就係加拿大女歌手CelineDion，佢雖然只係喺拉斯維加斯一個地方賣唱，但已經賺咗四千零八十萬美元，亦即三億二千萬港元。此外，入到二十大嘅歌手包括第四位嘅比緹美娜（BetteMidler）同第十一位嘅Beyonce。