郭晉安近日忙於拍攝無綫以六十年代為背景的新劇《同撈同煲》，經常要扮鬼扮馬，日前安仔便要扮大俠跳城樓，雖然並非首次拍跳樓戲，但安仔表示仍感到十分驚青，甚至驚到連上香求平安都忘記了。
郭晉安與馬國明日前為無綫新劇《同撈同煲》拍攝一場跳城樓的戲份，劇中郭晉安不時要扮鬼扮馬，繼早前與馬國明一起扮媽姐後，今次更要頂替好友馬國明扮大俠跳城樓。
安仔說：「劇中好多好搞笑嘅場面，今日係拍一場戲中戲，內容講原本係馬國明要跳，點知佢臨時縮沙，咁我身為佢嘅好兄弟咪幫佢頂囉！」
郭晉安自言今次並非首度拍攝跳樓戲，而無綫亦做足安全措施，但仍然感到十分擔心，他說：「頭先吊咗落去都OK喇，呢度都有成四、五層樓高嘅，以前拍戲都試過喺八樓跳，雖然今次唔係第一次拍，又有威吔吊住，但係始終都有啲驚。公司其實都有安排替身畀我，不過冇所謂喇，最終都係要跳落去。」
問到安仔開工前可有上香祈求平安時，他說：「我一聽到話要拍跳城樓都已經好驚，驚到唔記得咗上香，你唔講都醒唔起，不過拍親呢啲戲都應該上香祈求心安理得。之前試過喺大陸拍劇，我日日上香都係求心安，即使係其他人有事都唔好喇。」安仔笑言今次拍跳樓戲可算是為藝術犧牲，原來安仔向來都不敢玩「笨豬跳」等活動，他說：「我唔敢玩，拍劇就話冇得講啫，有得選擇就梗係唔玩喇。」
採訪、攝影：王崇穎
