香港7.1精神，五十萬人遊行，展現高質素，除咗特區一小撮不知天高地厚嘅土共仇恨入骨，贏得國際文明社會尊敬。連一向少評論香港問題嘅德國，亦仗義支持香港人。德國外長菲舍爾喺北京見完中國外長李肇星，亦喺記者會公開支持港人支持普選！
李肇星一聽見德國外長表達公正立場，即時面黑，竟罔顧外交禮節，聲稱中國「不須外國教導」點樣管理香港。李肇星重公然顛倒黑白，話喺「英國統治時代，香港同胞沒有任何民主自由」！
殖民地時代，香港冇民主，亦毋須民主，因為好可惜，當年香港人無限信任英國，宗主國嘅西敏寺議會，就係對殖民地政府嘅民主監察。至於「沒有任何自由」，李肇星簡直開眼講瞎話，冇自由，香港會有幾份左共喉舌報，六七十年代大吹大擂文化大革命，大罵「美帝」及「蔣幫」，不受干擾，嘈足咁多年？又有國民黨的《香港時報》，亦長期形容大陸政府係毛首及共匪？冇任何自由，香港啲國貨公司會正常營業，一直到最近，波斯富街嗰間老牌國貨公司先至自己頂唔順執笠？冇自由，廣播員林彬會遭暴徒燒死，而暴動首領楊光反而可以逍遙法外，重攞埋大紫荊？左校可以開店，畀你扯五星旗？冇自由，六七十年代會有咁多難民翻山越嶺冒死偷渡？
至於德國外長，亦係好有道義。香港人咁多年幫襯咗咁多德國名車，賓士、福士、寶馬，但香港人唔似大陸啲自由行遊客，淨係識得迷戀物質，亦認同德國實行嘅民主制度，特別係目睹八九年東德共黨政府垮台，東德人民可以回歸一個民主自由嘅大西德，香港人重鬼咁開心㖭！
正如毛伯伯話齋：「得道多助，失道寡助」，香港人嘅民主和平精神，受到歐美日等尊敬，證明香港人（土共及維園阿伯除外）率先與國際接咗軌。
李肇星話香港點樣管治，毋須外國人教，佢又錯嘞。阿董就有一個乜嘢國際專家「督導委員會」，預咗筆公帑，諗住年年頭等機票請一班鬼佬VIP專家嚟開一次會，教吓特區政府點樣治理經濟，可惜開開吓，捧場客一年少過一年，變咗拍烏蠅，可見中國就算想鬼佬教佢點樣治港，人哋都未必肯畀你學嘢。
李肇星失禮國際，經已唔係第一次，呢啲係佢個人嘅事，不過混淆大是大非，一定要駁斥！中方官員，用咁嘅畸形角度睇世界，點可以同港人「溝通」？李肇星自己諗吓喇，不過佢呢一世都未必諗得明喎。
傳真︰2623-9278
電郵︰