有「高官飯堂」之稱嘅中環鏞記，自有番鎮店之寶燒鵝賣之後，日日爆棚旺到不得了，就算食環署出咗份報告指炭燒燒味有致癌物質都絲毫不受影響。
房屋及規劃地政局副秘書長曹萬泰就喺四樓長駐打躉，一連兩日同議員喺鏞記食晏，一日係同前綫卿姐，噚日就約咗民主黨黃成智，可見秘書長對鏞記有幾鍾情。
黃成智話同曹萬泰主要傾城規條例問題，至於好多人關心嘅西九龍文娛區發展問題，曹萬泰就叫佢忍吓口唔好問咁多問題，黃成智稱曹萬泰定期會約議員食晏，主要吹吹水收收風，有乜敏感政策都可事先摸底。
佢又向曹萬泰建議將一啲空置官地平租畀志願機構做有機農場，既環保又唔使丟空養蚊，不過官府莫財，推行新措施唔係咁容易。
傳真︰2623-9278
電郵︰