九月唔會再參選立法會嘅民主黨羅致光（圖），任內最後一擊係主持沙士調查委員會，份措詞溫和嘅報告一出竟然搞到兩個公職人員下台，羅致光話楊永強下台都係預料之中，但梁智鴻都話辭職實在無咩需要，事關無論點都好佢嘅任期根本就快滿，倒不如做埋呢幾個月，安撫吓啲醫護人員情緒，好過𠵱家個個走出嚟咁鬼激動。
繼沙士報告後，佢噚日又出咗份叫做《香港環保演進》嘅工具書，歸納一下香港環保政策嘅演變。真係唔講八方差啲都唔記得佢係民主黨嘅環保政策發言人。
羅致光話，自從○一年民主黨常委個個冇得返大陸之後，佢哋喺政府坐開嘅諮詢組織就一個一個咁唔再被委任，直至今年冬天請佢加入環境保護運動委員會，先至有突破。
傳真︰2623-9278
電郵︰