國家領導級人馬霍英東個孫霍啟中最近惹官非，立即引起各界起哄，追問霍老係咪家教唔夠森嚴，霍老答得好得體，唔通乜都幫個孫咩。
而噚日霍啟中大伯霍震霆出席喺紅磡都會海逸嘅世界女排大賽記者會，被問到對呢件事點睇？佢話希望個姪喺今次件事中吸取到教訓，因為霍啟中喺外國生活比較難照顧到佢。霍震霆話之後都有見過佢，重話個姪同佢講覺得好對唔住屋企人，講完呢句之後霍震霆就急急腳咁要離開班記者，唔答任何嘢。
其實霍家第三代均已長大成人，早前被周刊拍到同明星章子怡打得火熱、霍震霆嘅二公子霍啟山呢個月就喺英國大學畢業，雖然立法會選舉在即，霍震霆都以愛子為重，遲吓一家飛去英國出席畢業典禮，大約二十四號先返港，如無意外，二十六號宣布參選。
霍公子今次並非全無對手，民主黨嘅林漢堅話會同佢撼；不過，有消息話「爆炸頭」岑建勳轉軚投誠會幫佢排除萬難，搞掂班民主派，所以岑建勳得到回鄉證嘅獎賞。
八方問霍公子身邊嘅人可有此事，佢哋梗係冇可奉告，咁如果霍家真係得嘅，班民主派就可直接向霍公子或者霍老申請回鄉證啦。
（圖）霍啟山畢業，佢阿爸霍震霆會飛去英國參加畢業禮。
傳真︰2623-9278
電郵︰