黃凱芹（Chris）前晚喺九龍灣展貿出席「903萬人迷大作戰」活動，Chris話自己鍾意嘅女仔要「好樣、齊陰、好人」，每講一個特質，主持人ILoveYouBoy'z就齊聲嗌周慧敏個名。
而現場就有一個女fans抄咗三百句「黃凱芹唔好返加拿大」嘅字句，博得一個親近偶像嘅機會，點知大會安排兩人企喺兩個有距離嘅箱上面，畀二十秒時間女fans掂吓Chris，不過Chris卻全程係咁閃避，好似好驚咁，最後只係好敷衍咁同個fans拖一拖手。
事後Chris解釋話因為之前拖住個女fans唱歌，感覺到台下有好多敵意嘅眼光同咆哮聲，為免其他fans呷醋，所以唔敢同呢個女fans太親熱，如果因為咁傷害到呢名女fans，佢話願意道歉咁話。
而Chris喺台上就同女舞蹈員示範跳舞，個女仔喺Chris身後不停伸手摸佢，Chris就驚到用手遮住何B仔部位，好鬼搞笑。
無綫劇集《赤沙印記＠四葉草2》噚日喺清水灣拍攝，劇情講述三妹陳自瑤喺夢境中，夢見大家姐楊囗囗同一個手臂有四葉草胎記嘅男人結婚，而呢個男人竟然係歌手許志安。安仔噚日話自己一直都有興趣拍劇，雖然只係客串一日，不過都覺得好玩；另外監製錢國偉話鄭秀文都會客串，不過正研究有乜角色啱佢做，但就肯定佢同安仔唔會同場出現。
羅大佑喺台灣間屋早排俾法院查封，噚日佢終於喺峇里島度完假返去，佢話好多人同佢講，如果冇屋住就去佢哋度住，至於呢件事嘅詳情，佢話交咗畀律師處理，唔方便講咁多，佢𠵱家最想喺呢個月二十號嘅五十大壽，可以同十九號生日嘅老友李宗盛、二十一號生日嘅張艾嘉一齊飲酒開party度過。
洪天明噚日出席一個無綫活動時，被問到佢嘅前度女友徐子淇同恒基二少李家誠傳緋聞嘅事，天明話自己已經三十歲，暫時唔會諗拍拖嘅嘢，希望努力工作打好事業基礎。問佢係咪曾經俾人嫌窮，天明就話：「雖然有啲女仔好現實，但我覺得只要盡本份緊守自己崗位，唔一定要做有錢佬。」不過後來天明又好酸溜溜咁話：「通常靚女都係配有錢佬。」
陳見飛噚日穿着小背心喺中環出席日本一護膚品舉行嘅記者會，佢話最近喺北京結識咗一名外籍男友，重帶佢去跟父親同細佬陳冠希見面。
陳見飛話：「爹哋冇畀意見，淨係擔心我講得英文多，啲國語會退步。」
