立法會議員李家祥噚晚請記者唱卡拉OK聚會，一定唔怕俾人話賄選，因為佢老兄一早已經宣布唔玩。李太有番個老公陪佢多啲，當然好開心，重大開黃宏發嘅玩笑，話發叔最開心係佢位讀神學嘅公子新婚，因為發叔一直好擔心個仔立志獻身宗教，終身不娶。發叔當然唔認，話一啲都冇憂過。而且黃家已經有好幾個第三代，即使囝囝唔生都唔會影響傳宗接代。
胡經昌就特地送咗四件水晶擺設畀李家祥，而李家祥嘅中學師兄鄭慕智噚晚都有到，話當年同讀聖保羅男女校時一齊加入合唱團。
李家祥唔使再陷入政改困局，當然輕鬆，政務司司長曾蔭權噚日就重要主持政改諮詢，請埋新界西地區人士一齊傾，會上七嘴八舌。煲呔最後話，反映意見時會包括埋7.1遊行後嘅民意。
傳真︰2623-9278
電郵︰