先科國際（724）被廉署調查一事，對證券界帶來些少震盪，好多原本摩拳擦掌想開車嘅細價股，紛紛暫停，觀望事件發展。
雖然係咁，但亦唔代表完全冇人做嘢，好似益華國際（370）剛剛公布同人簽署備忘錄，以1.6億元人民幣代價，收購一間生產焦炭同副產品公司不少於51%股權。
自從呢單交易曝光後，向來成交淡薄嘅益華，交投即見活躍，噚最高見過0.102元，收0.099元，升5.3%，但仍然未脫離仙班，成交股數大增至1428萬股，金額138萬元。
經紀陳話，炒賣益華的投資者，主要以大陸同胞為主，本港炒家冇乜沾手，或者因為咁，所以冇受呢幾日嘅細價股風潮影響。
不過，益華股權易手之後，搞過唔少務業，例如基因生物科技，之前又話搞教育，但都好似冇乜成效，今次又轉搞焦炭務業，真係要睇過先知。
近年來煤炭股如兗州煤業（1171），股價走勢凌厲，兗煤配完股之後，一直企硬在配股價樓上，兼夾有大摩出報告力推，所以益華轉型呢行生意，都可算合時。
慕容小初