買別墅露玄機？正當皇家馬德里斟韋拉消息不斷之際，英格蘭傳媒踢爆奧雲喺馬德里市郊外買下兩幢別墅，莫非為轉會皇馬鋪路？
據英國《太陽報》報道，奧雲早前到西班牙同家人度假時，決定花費八十萬鎊（約一千一百六十萬港元），喺馬德里市郊外，買兩幢白色兩層高別墅。由於奧雲𠵱家喺英國同家人都係住埋同一條街，估計今次喺西班牙一次過買兩幢別墅，其中一幢留畀父母住。上季碧咸轉會皇馬前，亦係畀人踢爆喺西班牙買大屋，所以上季一直傳有可能過檔皇馬嘅奧雲今次置業，我求大俠覺得有玄機嘅。
保頓季前訓練經已展開，周三重踢第一場季前熱身賽對登地聯，但球會重未見巴西前鋒查度報到，助教話佢自從上季話返聖保羅歇暑後，一直音信全無，唔知去咗邊度。查度當年俾士砵亭踢走都係因返巴西後玩失蹤，保頓早前簽咗費迪南同布歷捷斯兩前鋒，怕且唔使要查度都得。
狼隊前鋒H卡馬拉見隊波降班就想轉會，暑假之後亦無歸隊報到，務求球隊放人。但佢同球會合約未完，英國職業球員聯會就建議狼隊hold住佢個註冊名額，等佢唔能夠去第二度落班，直至佢賠番合約剩低嘅人工。相信呢單嘢都冇彎轉，H卡馬拉自作自受都怪佢做嘢冇諗後果啦。
利物浦領隊賓尼迪斯新官上任未見有收購球員大動作，反而先向該隊名宿魯殊，提供一紙全職教練合約，當然係睇準魯殊對利物浦嘅深厚感情及認識，幫到手啦。魯殊上季有份做利記助教，不過只係兼職；賓尼迪斯呢一着又係幾醒嘅，以魯殊嘅受歡迎程度，攞到啲球迷歡心先啦。
剛轉投曼城嘅國腳後衞米斯大讚新東家係一間「大球會」；轉個頭曼城前鋒安歷卡就向記者表示，希望轉到「大球會」發展；曼城有幾「大」，真係要問呢對孖寶至知囉！不過米斯之前過檔米杜士堡，又係話米堡係「偉大球會」喎，我求大俠淨係擔心孫繼海唔夠呢個擦鞋仔爭位踢。