我大口羅拉一直覺得Sonim呢個少女偶像喺日本藝能界捱得好辛苦，佢為咗博出位，練到成個筋肉人咁，真係令人慘不忍睹。但原來Sonim細個嗰時，已經非常勤力學藝，同一般小妹妹唔同㗎！
Sonim喺屋企排行最細，有一個姐姐同一個阿哥，佢出世嗰時六磅重，未夠一歲已經長得精靈可愛，逗得阿爸阿媽鬼咁開心。Sonim兩歲嗰陣，眼仔碌碌，笑起嚟又夠甜，天生一副明星相，似乎注定食呢行飯。
喺六歲嗰陣Sonim已經離開咗高知縣老家，入讀愛媛縣松山市嘅民族學校，嗰陣時嘅佢都幾勤力，除咗學彈鋼琴外，重學游水同書法，Sonim重曾經成為全日本英文演講比賽嘅冠軍，佢話：「我細個記性唔好，歷史最差，不過，對英文好有興趣，當年重過咗十關，成為全日本民族學校英文演講比賽冠軍。」
Sonim到中學嗰陣就搬到神戶同嫲嫲一齊住，咁多年嚟，Sonim覺得自己身份好特別，佢話：「我唔係日本人，又唔係韓國人，我係在日嘅韓國人。」而Sonim最近終於爭取到主演富士「月九」重頭劇《東京灣景》，喺入面就飾演在日韓國人，所以佢話份外有親切感，而喺劇中所穿着嘅韓服，都係由佢親自設計。