上星期在飯局碰到闊佬F，佢話數碼港一間新酒店環境幽靜，隔鄰商場內嘅戲院有IFC二期戲院咁靚，叫左丁山去體驗吓。點體驗法呀？闊佬F話最好搵女朋友或者阿二，一齊去貝沙灣酒店住番兩日，黃昏時分到沙灘漫步，夠晒羅曼蒂克，唔使去泰國布吉島喎！
左丁山冇資格搵到個阿二，於是周末就同阿一坐的士入數碼港見識吓。自IFC二期坐的士，行域多利道，經過碧瑤灣住宅群，入到間酒店，的士費八十六蚊，嘩，幾貴噃，交通費咪好厲害？
行經摩星嶺時，的士司機猛叫我哋睇國家領導人霍英東（全國政協副主席）嘅大宅，果然氣派不凡，在山巔之上，眺望汲水門，海景絕佳，左丁山咁冇料，都知道呢度風水好到冇得彈，主人會發到唔清唔楚。
若非去數碼港，左丁山十世都唔會走到摩星嶺，路經富貴人家大宅。星期一閱報，《東方日報》頭版頭條報道警察在沙宣道拘捕一名青年，身上藏有大麻，呢位青年就係國家領導人霍先生個孫。呢單新聞，點解《蘋果日報》冇刊載嘅？如果唔係《東方》咁大篇幅報道，《蘋果》讀者會走晒眼。星期一中午吃飯之時，公子L玩花臣，手機下載咗《義勇軍進行曲》，有人打電話畀佢，佢嘅手機就響起：「起來，起來……」之聲，中貿林幽佢一默，問：「係唔係朝朝有人morningcall，手機一響，你就起來起來，行升旗禮呀？」公子L唔睬佢，只係講：「點解《蘋果》咁走寶，竟然唔登國家領導人家族嘅新聞？」
在座冇人識答，或者第日得閒問肥佬黎一聲，係唔係咁識do呀？