選舉期近，親中勢力針對民主派候選人嘅暴力行為升級。早前第一階段，就係潑屎，現時鄭家富喺厚德邨嘅辦事處，已遭到暴徒擊碎玻璃，遲啲會唔會出刀出棍，就重未知。
劉慧卿去信保安局局長李少光同李一哥，嚴正要求維持維園論壇嘅穩定。卿姐話，佢最近出席論壇，頻頻遭到親中嘅維園惡伯暴力攻擊，用枴杖雨遮勁扑車身，粗言穢語兼滿嘴生殖器官、喧嘩暴叫，更不在話下。
維園惡伯長期由本地親中勢力撐腰，有官方背景，呢一樣係人都知。佢哋以前係工人，絕大多數喺一九六七年參加過赤色暴動，顛覆政府，放炸彈殺害平民。後來因種種原因，未得到由毛頭江青至胡溫政府嘅妥善照顧，又因教育水準太低，平時冇精神出路，惟有潛伏喺維園每星期一鑊作出粗暴嘅情緒發洩。
七一大遊行，維園呢班超齡土共，因畏於正義力量，作鳥獸散，平時就坐喺長櫈，到咗維園論壇嘅周日，就係佢哋報效祖國嘅時刻。警方當然知碇，長期縱容呢班赤貧愛國暴徒，笑笑口咁袖手旁觀，即是間接鼓勵暴力。
李少光掌管保安，佢明唔明「保安」兩個字點解？如果佢識字，就履行公僕職責，展開「清園驅伯排污大行動」，將港島區呢忽皮膚癬鏟除，還我所謂「國際大都會」名譽，而唔係以愛國為名，向中方交心，闊佬懶理。若然唔係，未來兩個月，暴力將會升級，有乜依郁，一切惟李少光問責。
選舉期間，胡國興大法官下令，任何論壇要保持中立。維園阿伯暴徒一向擁董，只針對民主派瘋狂攻擊，從來唔會鬧本是同根生嘅民建聯，請問胡大法官，坐視不理，咁係咪客觀中立？
維園阿伯暴徒問題，積陋十幾年，一早就要處理，但由衞奕信至肥彭嘅前殖民地時代一直非常欣賞中國農村文明嘅精華，當然唔會插手，拉班阿伯，佢又猛唱國歌，高呼愛國無罪，影響鄰近地區關係。
好嘞！搞到現時維園呢一角，變咗英國佬所留低嘅一篤蘇州屎，雖然正本清源係中國所排泄，但英方唔理，任由佢臭到二○○四年，當然亦有相當責任。
傳真︰2623-9278
電郵︰