今年上半年，摸貨量最多嘅港島甲級商廈，係金鐘力寶中心及上環信德中心兩幢熱賣商廈，分別有二十一及十二宗。不過，原來有啲冷門商廈，炒得重厲害。
聽屋之島董事總經理黃志強講，金鐘遠東金融中心及灣仔海港中心，上半年有六宗及四宗摸貨成交，同佔大廈成交比例六成七，比力寶同信德嘅四成二及四成為高。
另外重有摸上摸成交，包括力寶中心與灣仔會議展覽中心，其中會展三十一樓○八室，逾千四方呎，三月以呎價逾五千四摸出，持貨四十日，賺一成，五月再以呎價六千摸出，四十九日獲利一成一。會展上半年共有九宗買賣，四宗係摸貨。
至於其他較少人諗到會有摸貨成交嘅商廈，有中環環球大廈、金鐘海富中心及上環中遠大廈，各有一宗。
黃志強指出，上半年港島甲級商廈共有一百四十六宗買賣，摸貨佔五十四宗，比例係三成七。
鴨脷洲深灣軒開始放租唔夠兩個月，已經成交超過三十宗，最新呎租更飆升至二十蚊，幾乎與南區豪宅看齊。美聯黃健雄話，一座低層連平台，六百三呎，以一萬二千六租出，每呎二十蚊。
租客係外籍，對平台單位情有獨鍾。個平台只不過五十零呎，但老外普遍重視戶外空間，又見呢類貨極之罕有，於是不惜高價承租，比一般高四分一。
業主以二百七萬購入，原擬自用，見回報五厘六，加上租管撤銷及租客背景可靠，決定轉為出租。
大地產商新地，重視與僱員打好關係，最近為退休員工成立「新地長青會」，會員有幾十名，上月搞過第一次聚會。
新地副主席郭炳聯話，佢哋三兄弟受到父親影響，一向重視員工關係，與合作多年嘅同事，建立深厚感情，即使同事退休，都希望呢份感情延續落去。
蘭西相信，部份會員，係新地老臣子，喺公司未成立前，已追隨前主席郭得勝多年。
早前有代理報料，話電台DJ買沙田瑞峰花園，買家身份終於曝光，原來係八十年代商台紅DJ何嘉麗，現職九巴企業傳訊部主管。
雖然離開電台十幾年，唔少聽眾記得佢。何嘉麗原本租住瑞峰對面聚龍居，上月以五百萬，連車位買入瑞峰一座低層B，近千七呎，呎價三千。
恒基西灣河嘉亨灣係本月焦點盤，原本估計，代理下個禮拜誓師造勢。豈料，發展商噚日會晤代理後透露，誓師大會要再遲一周，即係二十六號先舉行，而翌日晚上開放示範單位畀代理參觀。
代理估計，開咗示範單位，重要收一輪票先至賣得，所以未必趕得及七月登場。市場人士一向視嘉亨灣為支持七月份一手交投嘅重點盤，如果真係趕唔切，即係樓市淡風重有排吹。據講，個盤收緊票，本票十萬元，行內話已經有三百票。
蘭西
電郵地址：
