兩個多月前，香港開設首間NewBalance專門店，但貨色方面始終未及日本，甚至未及水貨店，大熱的1400及1500都未見影蹤，頭炮的阿葛×NB576曝了光但未公開發售，不少潮友都大感失望。又未使投訴住，話晒呢對阿葛×NB576屬全球首對黑色NB，兩方面都唔想有乜差池，慢功出細貨難免耐少少。上星期，NB終於宣告阿葛×NB576鐵定7月17日正式發售，售價$1,650，限量250對，呢對鞋日本都未有，單係呢點，經已值回票價。
記者、攝影：李崗華 部份攝影：蔡鴻雯
完全版阿葛×NB576鞋身顏色與之前見街的初版一樣用上全黑，就連NB嘅3M反光招牌N字亦改為阿葛最愛的黑色，可見NB今次真係畀阿葛極大的自由度。唯一唔同是與初版比較，鞋脷上的×字放於阿葛與NB的字樣上下，而初版則放於中間。而4A的Logo由初版的普通機織，改為較貴及工序較多的刺繡。順帶一提，有興趣買鞋的讀者當日除早啲嚟排隊外，阿葛會於當日下午2:30親臨舉行簽名會，Fans記得到場。
（$1,650/7月17日發售）
雖然睇相未可以清楚見到刺繡的厲害，但一摸上手就感受到比一般波鞋的做法較有質感。以「04.250×AKAKMF」250即代表限量250對，AKA則代表別名（asknownas），KMF即葛民輝英文簡寫。而一直以來NB鞋身的大N字為3M物料，但今次的合作版NB就應阿葛的要求改為黑色，雖然無咗夜晚跑步時的反光功能，但相信冇乜人會捨得着佢嚟跑步。
自1906年至今，NB將近百歲。最初只是一間生產鞋墊的小公司，由於鞋墊做得出色，加上運動員提出要求，希望度身訂做運動鞋。及後1961年，因公司的轉型，NB決定開始生產運動鞋，而首對作品就是Trackster，用上橡膠作鞋底以減少回震，更設有狗牙底，令運動員的雙腳更貼地，Trackster的出現，標誌NB進入新年代。後來NB更陸續發明不同的避震系統，當中最為出名的有「EACAP」及「N-ERGY」。
阿葛與其他單位合作，可以話係一浪接一浪。繼NB後，最新合作的單位就係麥當勞，但今次就唔係推出產品，而係設計香港職員制服。阿葛設計制服？咁咪好潮？麥記的員工真係有福！
A：記者 K：葛民輝
A：點解今次會用上576，而非你常着的1400？
K：最大的原因係1400經已停產，繼1400後我最愛既就係英版576，加上上次推出Figure都係着576，所以就用上英版576。
A：點解會展開今次的合作？
K：今次係NB搵我，話係為慶祝香港的新舖開幕，想搵我製作一對屬於我的NB，嘩！我見有我個名咁勁，加上咁耐以來我都未見過有人可以將自己個名印上NB鞋面，所以就展開今次的合作。
A：你差不多將全對鞋都用上黑色，係NB的第一次，合作上有甚麼困難？
K：問題就係我從未設計過鞋，根本唔知道有啲地方係唔可以改動，因為會影響全對鞋的力學問題，所以從顏色上着手。我出名鍾意黑色，所以就用上黑色，但由於要同英國方面商議，一來一回最少都要3個星期先睇到個實物效果，所以都要幾多時間先至完成。
A：有冇朋友要求你送鞋？
K：對鞋未正式推出時，呢對鞋經已於網上通晒天，所以近期我收到不少日本好朋友的E-Mail，問我可唔可以要一對，但今次真係得250對，絕對冇特別做多用嚟送禮，所以我都好頭痕，我希望可以問NB要到40對，但就應該唔會個個朋友都有，但Nigo我諗一定有，因為佢極鍾意NB。
A：呢次合作之後，會有下一次？
K：我當然希望有下一次，但如果再做，希望唔只係改動顏色，我好希望重新設計一款新的NB鞋款。
售賣點：NewBalance專門店（23676663）
尖沙嘴海運大廈OT215舖