個市一開就散，「724事件」影響人心，45分鐘後見全日最低位12012，埋單12078，跌112點，下跌股隻幾乎係上升股隻嘅4倍。紅籌指數跌幅稍大過恒指與國指，但亦有啲好硬淨嘅，招商局（144）就係，企定喺10.25元。
招商局有隻Call輪9264，重有1個月壽命，快趣冇得玩，輪價8.3仙，溢價不斷縮，縮得好啱，縮到夠鐘之時，會冇晒，𠵱家0.8%，槓桿率12.4倍。未來1個月，招商局如果跌到9.50元（Call輪行使價）以下，隻輪可以用嚟墊煲底，但一個唔覺意，正股只係升得5%，隻輪就會值12.6仙，升幅超過5成。隻輪對正股反應好敏感，細細注賭呢件，要預咗贏輸會好大。
中銀（2388）亦係企硬一分子，收12.95元。中銀02年7月以每股8.50元招股，去年8月初之前，重係8元潛緊水，8月宣布中期業績後浮水兼坐火箭，諗住下個月派中期成績表後有嘢睇，可先行細注收集Call輪，主角係9169，明年2月夠鐘，溢價6.1%，槓桿率9.5倍。鍾意搞仙輪，揀9736，明年6月夠鐘，輪價5.9仙，溢價21%，槓桿率21.9倍，若然正股長期牛皮，揸隻輪會輸溢價，所以隻輪只適宜喺正股有動靜之時炒佢三朝兩日，坐盤坐得耐唔化算。
地產股估計跌後有技術反彈，可以諗吓新地Call輪9391。9391年底到期，輪價50仙，溢價8.1%，槓桿率12.8倍。
章盛