二人女子組合Twins和房祖名等前晚同台獻唱，三人不約而同頻頻甩嘴兼忘記歌詞，表現失準。問到房祖名是否因與緋聞女友鍾欣桐（阿嬌）同場，所以特別緊張時，他只答：「唔知。」而阿嬌則幫口解圍說：「佢可能想話唔識答呢啲問題。」
組合Twins、房祖名和男子組合Boy'Z等，前晚齊到灣仔會展出席「新城熱火潮Twins零舍大派對」，蔡卓妍（阿Sa）和鍾欣桐除唱歌走音又頻頻甩嘴外，更不時忘記歌詞，認真失威。而當Twins與房祖名合唱成龍和蘇慧倫的歌曲《在我生命中的每一天》時，三人同樣表現緊張。
問到Twins是否因久未在舞台上演出以致出現甩嘴情況時，阿嬌說：「吓！係咩？唔好意思，對唔住。我諗呢個係音樂會，應該可以再嚟一次，不過我哋未試過，唔好意思。」而阿Sa則說：「係咩？我喺台上唔覺喎，我好耐冇唱歌，好開心見到咁多人嚟支持，我哋遲啲會去東莞同中山開演唱會。」
而記者問房祖名是否因與緋聞女友阿嬌同台演出故心情緊張時，他只答：「唔知。」阿嬌聞言即說：「佢可能想話唔識答呢啲問題。」而坦言與無綫沒約在身的房祖名，之前無論接受無綫或有線訪問時，都毫不避忌地用廣東話回答問題，但前晚他接受有線訪問時，卻煞有介事地以國語受訪。
此外，大會前晚的通告上本來只有Kenny的名字，但臨場卻見Steven現身，問到他可是已解凍？Steven一臉尷尬，大會則表示是打漏了Steven的名字。
採訪：卓美娟
攝影：仇志德
