立法會今屆閉幕，九月大考在即，大家搞謝師宴，阿董好似一個慈祥嘅班主任，親自到場勉勵立法會議員小朋友，九月選舉多多努力，又話自己好念舊，希望到咗十月，會再見番在座嘅絕大多數。現場氣氛，一片和諧溫馨。
冇錯。立法會九月又要考試嘞。可惜，呢場考試，係一場唔公正嘅會考。有啲人要落區直選，考足中英數理化史地聖經等共十科，但有啲人毋須直選，由小圈子篤手指搞掂，即是唔使考咁多科，淨係考美工勞作兩科，求其交一幅烏厘馬叉嘅塗鴉，就可以保證及格。
不過，亦有啲人，本來只須考美工勞作就可以過骨，可惜得罪咗校監校長，要佢哋親自落區直選，考足十項全科。田少同周梁，傳說就係兩位受害人。佢哋本來一向循功能組別出選，點知因為田少23條七七事變，同最高學校當局作對，校方大為震怒，23條擱置，中方永難原諒，於是田少為咗要將功贖罪，就要讓番個功能位出嚟，畀愛國愛左人士參「選」，而自己就累埋莎姐，要齊齊焗住直選。
由中方嘅角度，確係有賺冇賠。田莎兩人若果輸咗，咁國家就認為係抵你死，要佢哋為七七事變付出代價。之不過，兩人若果贏咗，咁自然將來就會知死而更堅定愛國，中方變咗喺直選陣營多咗兩票。
田少選新界東、莎姐去新界西。新界東多中產，新界西多鄉里，兩位精英身嬌肉貴，企街拉票，咁都肯制，除咗要佩服佢哋大澈大悟，無論幾唔情願，終於肯接受挑戰，都咪話唔有啲啲令人戥佢哋心痛。
而阿董口齒亦伶俐咗，佢話希望見番絕大多數立法會議員，亦即是話有一小撮，佢好行夾唔送，一世都唔想再見番。呢啲又係乜嘢人呢？除咗司徒華、羅致光等自動棄選嘅民主派，阿董最唔想見番嘅，唔知會唔會重包埋田少呢？因為阿董承認，兩年來「問責制」亦唔係咁理想。梗係喇，話到明「執政聯盟」喎，田少臨陣插一刀，隊冧23條，搞到「執政聯盟」崩潰，加埋話跟阿董「沒有榮、只有辱」嘅行政會議成員兼民建聯曾鈺成，亦唔知是否名列阿董好想十月見番嘅人選之列。阿董笑騎騎咁話中有骨，功力直追肥彭，可惜修到呢一級，都臨近二○○七，世事弄人，真係令人感慨咯呵？
傳真︰2623-9278
電郵︰