喺上星期場美洲盃分組賽撞親個頭嘅秘魯前鋒比沙路，原先諗住唞一個月就冇事，但事後證實頭骨裂咗，𠵱家手尾長，可能唞兩、三個月都未定。
比沙路喺上星期秘魯贏委內瑞拉三比一嘅A組分組賽中撞親個頭，原本秘魯軍醫以為佢腦震盪，但詳細檢查後，發現佢頭骨裂咗，要做手術修補裂咗嘅位置；而佢效力嘅球會拜仁慕尼黑見咁大件事，亦派腦神經專家去秘魯幫手。
原本比沙路唞一個月左右就可以出番嚟比賽，𠵱家搞到咁大鑊，拜仁方面就表示六個禮拜就一定走唔甩；至於佢嘅養傷時間會唔會再長啲，去到兩個月或者三個月，就要視乎佢嘅康復進度而定。
拜仁近屆都有前鋒重創，前屆有辛達告魯斯，上屆有薛基拿，今屆就輪到比沙路；照咁睇，佢哋要搵個師傅返嚟睇吓，布番個有利球員健康嘅風水陣至得。
杜文尼治做咗法國國家隊教練後，最開心嗰個一定係效力曼城嘅安歷卡。安歷卡因拒絕以後補身份入隊而同法國上手教練辛天尼唔妥，搞到俾國家隊雪藏，但杜文尼治話明唔會理個球員有乜過去，只要好波就可入隊，重點名讚安歷卡㖭。安歷卡有翻身機會，希望佢好好珍惜啦！
有「新基斯普」之稱嘅阿根廷二十歲前鋒卡雲拿基，一直係歐洲大球會羅致目標，但佢可能去俄羅斯效力莫斯科斯巴達。斯巴達出成千二萬歐元轉會費同百五萬歐元嘅年薪，利誘河床嘅卡雲拿基過檔，雖未斟掂，但成事機會好高。卡雲拿基質素幾高，如真去俄國搵食，可惜啲喎。
亞洲盃即將開鑼，焦點係中、日、韓，東道主中國嘅分組賽門票銷售當然較為理想，但同組卡塔爾、巴林同印尼對賽嗰啲就滯銷，為免場面冷清，賽會決定「買一送一」，買中國賽事門票就送一張，共送兩萬張，聽聞經已送晒。歐國盃都唔係場場爆棚，亞洲盃要高朋滿座，真係唔易。
米高佐敦真係好恨做NBA班主，最近又盛傳佢想收購邁亞密熱火。波神佢老人家果然有眼光，因為如果奧尼爾真係一如所料，由湖人過檔熱火嘅話，熱火肯定即刻成為東岸嘅爭標大熱門。不過熱火班主話明𠵱家冇興趣賣球隊，睇嚟波神要過班主癮都有排搞。