今屆立法會收爐，記者統計議員過去四年開會出席率捉懶蟲，港進聯朱幼麟因為出席率低俾人謔稱「懶豬」，不過好似7.1遊行人數咁，唔同人對數字有唔同演繹，飛天豬幫自己平反，再計多一次條數，結果發現過去四年佢參加咗二百五十九次會議，喺六十個議員入面排第十一位，有四十九個議員墊底，佢又同時加入三十個正式委員會，喺一眾議員中排第五，飛天豬話出席率唔係衡量議員係咪勤力嘅指標，反而開會次數更加重要喎，所以佢應該叫做「勤力豬」。
準備喺新界東出選嘅飛天豬又話，政府早前想搵佢拍個以滑翔傘空降維港嘅宣傳片呼籲選民投票，但佢怕俾人指博出位就作罷，其實飛天豬唔拍都好，因為拍套宣傳片影住佢插水式跌落維港，對選舉都唔係幾好意頭，你話係咪？
傳真︰2623-9278
電郵︰