GBA配件愈出愈厲害，繼播卡通片後，新配件居然踩過3G界，玩埋視像會議，打機打到悶，大可急Call豬朋狗友，望住對方個樣「隔空吹水」！
呢件咁抵死嘅配件名為CAMPHOAdvance，體積只有66×65×19mm，襯晒GBA輕巧細部嘅特色，只要將佢插入遊戲卡槽，即時就可顯示閣下副尊容，透過接駁室內電話線，更可跟遠方同樣配備CAMPHOAdvance嘅GBA玩家見面傾偈，完全毋須開台費、安裝費，此舉肯定可將視像會議進一步平民化。CAMPHOAdvance由做開流動視像系統嘅DIGITALACT所開發，機內配備11萬像素COMS感光元件，同時對應GBA及GBASP，預定七月尾係日本推出，雖然賣價只約港幣$1,300，不過首批得一萬部貨量，到港後好大機會炒起。
記者：徐影龍