沙田麗豪酒店內嘅餐廳俾食環署冚檔，限令停業，創下先河，記憶之中，香港從來冇試過任何一間三星至五星酒店俾政府封舖嘅，麗豪乜搞到咁大鑊。
記得沙田陳師奶係麗豪常客，喺麗豪入面嗰間中菜「豪苑」擺過生日酒㖭，於是打電話問吓佢：「冇中招吖嘛？」陳師奶話：「唓！有勞關心，我已經好耐冇去麗豪飲茶咯，十零年前豪苑就好好，啲經理話畀我聽一個月做三百萬銀生意……衰在個點心師傅走咗去稻香集團之後，水準一路跌，所以我都再冇心機幫襯。呢間酒店啲公關就好落力噃，成日寄啲推廣資料畀我，好吸引，但係工廠嘅生產線唔掂，產品多缺憾嘅話，任你做公關宣傳做得幾好，客仔都唔會幫襯你買貨啫，麗豪啲公關可算枉費心機！」
沙田只得兩間酒店，一間係新城市廣場嘅帝都（RoyalPark），一間係麗豪（RegalRiverside），麗豪開業在先，八十年代中係獨市生意，酒店內各食肆日夜爆棚，豪苑插針不入，馬主H第一次拉頭馬（夜馬）之時，就與馬主N、肥仔豪等成班人去麗豪咖啡室消夜，好多馬圈中人亦幫襯。照計呢間酒店鄰近威爾斯醫院，中文大學、科學園距離不遠，餐廳大把客路，生意應該不愁，只可惜咯喎，如沙田陳師奶所言，好多沙田街坊都知道佢跌晒watt，邊度會幫襯。
沙田其實冇乜高級食肆，幾間老招牌已無昔日風味，物無所值。新字號就一味鬥平，平到陳師奶唔夠膽批評，因為平到咁，你重想點？如果麗豪經此一役，勵精圖治，請番一啲廚房高手，注重衞生管理，一定會好快企番起身，因為沙田實在冇乜好去處也。