馮仁昭四圍超：
李宗盛又離婚朱衛茵安撫囡囡

李宗盛同林憶蓮前日分別向傳媒發出聲明，宣布佢哋已經離婚。同李宗盛已經離咗婚七年嘅朱衞茵，噚日喺台灣如常返電台做嘢，對於記者嘅追訪，佢感到好勞累同無奈。

「這麼多人找好累」
據知李宗盛同朱衞茵所生嘅兩個女，近排計劃陪爹哋去旅行度假。問到朱衞茵對前夫再次婚變有乜嘢意見，佢用國語話：「我不是當事人，謝謝大家關心。我發現光是被這麼多人找，就會損耗能量，我現在好累。」而李宗盛前日發聲明時，朱衞茵正同兩個女去睇戲，佢話兩個囡囡都知道佢爸爸嘅事，當時已經同囡囡講人生有時候會改變關係，但無論如何，父母對佢哋嘅愛係一樣嘅。
身為林憶蓮契爺嘅胡楓，噚日喺尖沙嘴出席無綫宣傳時話：「我暫時都唔打電話畀佢住，等佢心情平復吓先，我聽到呢個消息覺得好可惜，但都係順其自然，無謂勉強。」問胡楓可覺李宗盛為人花弗？佢話：「唔知，逢有呢啲新聞都有呢啲嘢傳出嚟。」

戴辛尉遭恐嚇即報警
戴辛尉噚日去咗灣仔警署報警，因為佢收到恐嚇電話，有人問佢想冇咗把聲定係想冇咗隻手，呢件事唔知係咪同佢被裝修公司追數有關，所以佢就去備案，等自己唔使成日提心吊膽。戴辛尉話：「𠵱家報咗警，警方話會派多啲人手睇住，咁我都安心啲，因為我係同屋企人住，有乜都好，應該要從正常途徑處理。」

準港姐徐子珊被指水性楊花
本報噚日收到一署名Vincent嘅報料信，佢自稱曾經係應屆候選港姐6號徐子珊嘅男朋友，佢喺封信度指徐子珊水性楊花，感情生活豐富，又自稱曾經同佢喺美國同居，但女方經常背住佢識其他男仔，其中一個叫阿Tom，徐子珊重同佢一齊去過日本讀暑期課程㖭，Vincent重暗示有人墮過胎。呢單嘢真係要搞清楚。

Isabella拍廣告變食家
梁洛施（Isabella）最近成為大快活嘅代言人，噚日佢一早就去到大埔一個山頭拍廣告，由於山路有唔少泥，而且重有蚊，所以Isabella做足晒準備工夫，着咗水鞋兼用毛巾將對腳包到實一實，實行唔俾蚊有機會咬到佢，睇佢拍廣告時又食車厘茄又煎魚咁，十足十一個美食家咁款，Isabella為咗今次廣告重食咗成百幾粒車厘茄㖭。