無綫前晚舉行《勁歌金曲》改革派對，數十歌手畀面赴會，其中容祖兒以性感熱褲亮相，令人懷疑是受到近日「翻版容祖兒」性感寫真影響。而《勁歌》監製強調歌手不能再夾口形演出，並說：「走音就唔使叫佢上嚟，走音係佢哋出醜。」
無綫前晚在灣仔會展舉行全新音樂大派對「心．深呼吸音樂大同」，各大唱片公司高層紛紛率領旗下歌手赴會，李克勤、容祖兒、鄭希怡（Yumiko）、楊千嬅、梁詠琪（GiGi）、許志安、黃貫中（Paul）、黃家強、房祖名、鄭伊健和《勁歌金曲》新主持何韻詩等紛紛上台jam歌，十分熱鬧，其中祖兒更悉心打扮以超短熱褲赴會，展露一雙美腿，Yumiko則以tubedress襯牛仔褲上陣，搶盡風頭。
祖兒打扮愈來愈性感，令人不禁懷疑是受到「翻版容祖兒」容祖宜性感寫真所影響，祖兒前晚說：「夏日炎炎，搵啲地方疏通吓啫，我唔覺得自己好有料，係肥同好肉哋啫！」
《勁歌》監製陳競游透露，昔日《勁歌》着重卡士，但本月二十一日改革後的《勁歌》則會以音樂為先，所有出席歌手均要唱現場，不能夾口形。問無綫可擔心歌手唱現場會走音？陳競游說：「走音就唔使叫佢上嚟，走音係佢哋出醜，歌手唔練好啲歌，做乜嘢歌手？佢哋出醜對節目冇乜影響。節目會以『勁歌金榜』做骨幹，我哋唔希望冠軍歌手上唔到嚟。」問是否不出席歌手便不會給獎？陳競游說：「唔會，但最好唔好，同埋睇吓乜嘢原因缺席。」
對於無綫今次改革，曾批評《勁歌》的阿Paul和家強大表贊同，他們認為終於有機會讓人知道甚麼是真音樂，家強又暗寸倚賴夾口形的歌手說：「有實力先可以上《勁歌》，如果fans見唔到自己偶像上《勁歌》，就要反省吓自己究竟聽緊乜嘢音樂！」
另外，前晚GiGi和伊健雖同場出現，但二人卻十分避忌，不肯一起合照，至於曾傳緋聞的傅珮嘉和Boy'Z成員Steven，亦未有打招呼。
採訪：胡比、楊潔雯
攝影：林德雄、何國豪
