近兩個多禮拜，港股在12345至12000間反覆爭持，上落只係300多點，但中段就好大波動，有1日嘅升勢同有兩日嘅跌勢都幾急；大升嗰日係6月30日，恒指曾上升212點，收市則升169點，而上周四就大跌200點，噚日亦一度急跌178點，收市報12078，下跌112點，期指又由高水轉番低水。
恒指跌穿10日線（12206）後，20日線（12126）同中期上升軌亦應聲失守，短期走勢向淡，50日線（11955）係第一道防線，若跌穿，則會下試上月中11800的低位。大市若真係再試底，亦只係中期調整嘅延續，時間可能再持續多兩三個禮拜，整固完成後，新升浪目標仍係指向13500。
國企榮辱互見，國指收4209，跌35點，跌勢最急之時，曾下跌95點，午後由低位回升，個別國企反彈之勢頗急，最突出係化工股，而個別原料股亦能力保不失，唔排除國企股短期到底，反彈有機會重試近日嘅高位。
‧江西銅業（358）最低3.5元，午後搶上3.7元，平收3.65元，成交2085萬股，大行仍繼續大手吸納，貨源好明顯係開始歸邊，短線反彈可重上近日高位4元水平。
‧上海石化（338）由低位2.475元掃上2.675元收市，反升0.1元，升幅3.8%，強勢畢呈，成交更大增1倍至2965萬股，股價又上番10日線（2.645元）之上，可上試月初高位2.775元。
‧北京燕化（325）反彈力度亦好勁，由2.425元上番2.575元收市，升7.5仙，升幅3%，成交亦倍增至1423萬股，升破10日線（2.583元）可上試月初高位2.75元。
‧鋼鐵股亦好強，重鋼（1053）收3.1元，鞍鋼（347）收2.875元，都係屹立不倒，但由低位反彈都成5%，而馬鋼（323）收2.5元，亦只係微跌1個位，3股嘅月初高位分別為重鋼3.275元、鞍鋼3.175元同馬鋼2.7元。
‧表現最差係中國鋁業（2600），收4.025元，連續4日下跌，跌幅已達1成，主要係受氧化鋁價格回落影響。中鋁04年（12月年結）保守估計每股盈利0.49港元，以仍低於國際同業的PE12倍計，股價應可重上5.8元，可趁今次調整喘定時博反彈。
郭兆誠