慶祝五十五周年國慶籌委會噚日正式成立。名單中竟然有放棄捍衞髮型嘅葉劉淑儀同埋因偷步買車被迫離場嘅梁錦松，雙雙做咗籌委會主席團嘅成員，有份搞今年嘅國慶活動，反而就嚟加入失業大軍嘅楊永強就冇份。
但係失業嘅葉劉同阿松，唔知點解噚日咁忙冇去開會，籌委會秘書長胡經昌解釋話，其實都冇規定話一定要到，佢哋係早排發信畀葉劉同阿松，邀請兩位加入搞國慶，兩個人都書面回覆話冇問題。
講開祖國，早排立法會政制事務委員會主席黃宏發，曾經發邀請信畀港澳研究所朱育誠，希望佢嚟香港同議員過兩招，解釋吓邊個喺度搞港獨，但係豬肉誠真係「敬酒唔飲飲罰酒」，反而去信媽叉發叔，話發叔連佢係邊個場合講過嘢都未搞清楚，就想邀請佢嚟香港係冇誠意，所以唔會嚟立會，發叔冇晒符。
傳真︰2623-9278
電郵︰