荷李活大導占士金馬倫（JamesCameron）九七年一套《鐵達尼號》，令佢變成咗「世界之王」，原來KylieMinogue嘅法國演員男友奧利華馬天尼斯（OlivierMartinez），亦拍過一部以鐵達尼號做背景嘅電影。不過，奧利華呢部今個月尾喺本地上映嘅《春田花花鐵達尼》，就喺愛情中加入唔少情慾元素，為鐵達尼嘅浪漫背後，寫下全新嘅解讀。
奧利華主演嘅《春》片，係由《共夫共妻》同《月亮代表我的奶》嘅西班牙導演碧加斯隆拿（BigasLuna）執導。《春》片雖然同《鐵》片一樣，係一個以鐵達尼號為背景嘅愛情故事，但男女主角唔係阿Jack同Rose，男主角係奧利華扮演嘅鑄鐵工人賀迪，因為贏咗一個比賽而有機會參加鐵達尼號嘅處女航行，佢同羅曼妮布寧格（RomaneBohringer）扮演嘅女主角瑪希喺船上發生過一夜情之後，展開一個浪漫感人、至死不渝嘅愛情大悲劇。
導演碧加斯隆拿一向擅長拍攝大膽題材，佢對情慾性愛場面嘅處理露骨而不失格調，完全發揮西班牙人奔放豪邁嘅一面。喺《春》片入面，隆拿一反常態，以較含蓄嘅手法拍攝戲中情慾場面，簡單一幕調情戲，比床上埋身肉搏更能撩動心神。